2Cor 13 | BOJ | STEP | E nami niŋgi qa boaiyeltem. Ariya bini e olo niŋgi qa bqajqa are qaleqnum. Agi Qotei aqa anjam bei nami endegsib neŋgreŋyeb unu, “Tamo bei a une atimqa tamo aiyel kio tamo qalub kio naŋgi aqa une unsib marqab di iga aqa anjam gereiyqom.”

2 Corinthians 13

Pol a olo Korin naŋgi qa bqajqa are qaleqnu

1 E nami niŋgi qa boaiyeltem. Ariya bini e olo niŋgi qa bqajqa are qaleqnum. Agi Qotei aqa anjam bei nami endegsib neŋgreŋyeb unu, “Tamo bei a une atimqa tamo aiyel kio tamo qalub kio naŋgi aqa une unsib marqab di iga aqa anjam gereiyqom.” 2 E nami niŋgi qa bosim niŋgi uratŋgsim bati bei e olo niŋgi qa bosim tamo une atoqneb qaji naŋgi di ŋiriŋ anjam minjrem. Ariya bini e sawa isaq endi sosiy tamo une atoqneb qaji naŋgi ti niŋgi kalil ti anjam endegsi merŋgwai, “E bunuqna niŋgi qa olo bosiy tamo une atoqneb qaji naŋgi di naŋgo une tingitetnjrsiy ŋolawotnjrqai.” 3 Kristus a ijo medabuq na anjam mareqnu kio sai kio di niŋgi qalieqajqa deqa e niŋgi qa olo bosiy tamo naŋgi di naŋgo une tingitetnjrqai. Yim niŋgi ijo kumbra di unsib bole qalieqab. Niŋgi quiye. Kristus a siŋgila koba ti unu deqa a lawo na nuŋgo kumbra tingitetŋgwasai. A na niŋgi aqa siŋgila osorŋgim unqab. 4 Bole, Kristus a ŋamburbasq di gaiŋesoqnej bati deqa a siŋgila saiqoji soqnej. Ariya bini a olo Qotei aqa siŋgila na ŋambile unu. Iga Kristus beteryejunum deqa iga dego siŋgila saiqoji unum. Ariya iga Qotei aqa siŋgila na olo Kristus ombla ŋambile sqom. Iga niŋgi qa bosim siŋgila di niŋgi osorŋgwom.

5 Niŋgi Kristus qa nuŋgo areqalo bole siŋgilateqnub kio sai kio deqa are qalsib nuŋgo segi kumbra tenemtoqniye. Niŋgi qaliesai kio, Yesus Kristus a nuŋgo are miligiq di unu? A niŋgi koba na sqasai di niŋgi a qa nuŋgo areqalo siŋgilaboletosai deqa. 6 Ariya iga Kristus aqa wau bole yeqnum. Niŋgi degsib qalieqajqa deqa e are qaleqnum. 7 O was qu, niŋgi kumbra uge yoqnaib deqa iga niŋgi qa Qotei pailyeqnum. Niŋgi iga nugsib iga Kristus aqa wau tamo bole degsib are qalqajqa iga deqa pailyosai. Niŋgi iga gisaŋ wau tamo degsib are qalqab di uŋgum. Gago areqalo qujai agiende. Niŋgi kumbra bole tiŋtiŋ yoqnqajqa deqa iga Qotei pailyeqnum. 8 Niŋgi qalie, iga Qotei aqa anjam ugetqa keresai. Iga Qotei aqa anjam siŋgilatqa waueqnum. 9 Deqa iga siŋgila saiqoji soqnim niŋgi siŋgila ti sqab di iga areboleboleigwas. Iga gaigai niŋgi qa endegsi Qotei pailyeqnum, “O Abu, ni na Korin Kristen naŋgi siŋgilatnjrimqa naŋgi torei siŋgila na sqab.” 10 Tamo Koba Qotei a na e siŋgila ebej deqa e aqa wau taqateqnum. E isaq endi sosim anjam neŋgreŋyonum. Di kiyaqa? E niŋgi qa bosiy e nuŋgo kumbra tingitetŋgwa osiy e anjam siŋgila na merŋgwasai. Tamo Koba Qotei na e niŋgi siŋgilatŋgwajqa deqa wau ebej. E niŋgi ugetŋgwajqa deqa wau ebosai.

Pol a anjam getentosiq naŋgi kaiyeinjrej

11 Ariya was qu, e ijo anjam getentqai. Niŋgi kalil kaiye. Niŋgi torei Kristen tamo uŋgasari boledamu sqajqa siŋgilaoqniye. Niŋgi ijo anjam quoqnsib dauryoqniye. Niŋgi kalil areqalo qujaitosib soqniye. Yim Qotei a niŋgi ti sqas. Agi a na niŋgi tulaŋ qalaqalaiŋgoqnsiq lawo kumbra eŋgeqnu.

12 Ariya niŋgi na nuŋgo Kristen was kalil naŋgi segi segi kundoqnjriye. Kumbra di agi Qotei aqa tamo uŋgasari naŋgi yeqnub. Qotei aqa tamo uŋgasari kalil qure endia unub qaji naŋgi na kamba dego niŋgi kaiyeiŋgonub.

13 Tamo Koba Yesus Kristus a niŋgi qa are boleiyeme. Qotei a na niŋgi qalaqalaiŋgoqneme. Qotei aqa Mondor Bole a na niŋgi kalil aqaryaiŋgimqa niŋgi koba na are qujaitosib geregere soqniye.